Santiago Centro pon á disposición dos comerciantes, xa sexan socios ou non, billetes de estacionamento con descontos que poden chegar ata un 80% sobre o prezo estándar, co obxectivo de que os establecementos poidan ofrecer estacionamento gratuíto aos seus clientes. Esta iniciativa, levada a cabo en colaboración co Concello de Santiago, reflicte o compromiso continuado da Fundación co programa de estacionamento que ven operando desde 2018 como unha estratexia para atraer clientes á área central de Compostela.
Cerca de cen establecementos xa se sumaron a esta iniciativa. A través de negociacións individuais coa gran maioría dos aparcadoiros situados na zona centro de Compostela, Santiago Centro conseguiu alcanzar prezos moi competitivos, que ás veces reducen o custo da hora de estacionamento a aproximadamente un terzo do prezo normal. A Fundación é a encargada de adquirir billetes en cantidades substanciais, que posteriormente os establecementos poden adquirir a prezos reducidos. Estes billetes son logo obsequiados aos clientes dos negocios en función da compra mínima establecida. Os comercios que participan no programa son facilmente identificables grazas a carteis visibles nas súas portas de entrada.
Os establecementos poden solicitar billetes dos aparcadoiros que lles resulten máis convenientes en termos de proximidade ou comodidade para os seus clientes. Actualmente, os aparcadoiros integrados no programa inclúen o Araguaney, Praza de Galicia, A Rosa, Praza Roxa, Estación Renfe, Praza de Vigo, Fernando III e Romero Donallo.
O programa de estacionamento gratuíto conta cun financiamento específico proporcionado polo Concello de Santiago e está aberto a comercios que non formen parte de Santiago Centro. A Fundación tamén subvenciona a adquisición de billetes por parte dos seus socios, permitíndolles así acceder a tarifas ainda máis reducidas.
