Santiago Centro, en colaboración co Concello de Santiago, ofrece aos clientes do Ensanche un programa de aparcamento gratuíto, que fai aínda máis atractivo mercar no comercio local. Agora, ademais de contar cunha atención personalizada, unha ampla selección de produtos de calidade e o trato próximo característico do pequeno comercio, tamén poderás aparcar sen custo.
Para beneficiarte, só tes que identificar os establecementos adheridos ao programa polo seu distintivo azul. Con cada compra, recibirás un tícket de aparcamento gratuíto e poderás acumular ata tres tíckets nunha mesma visita, sen ningún custo adicional.
Esta iniciativa, promovida pola Fundación Santiago Centro e a Concellería de Comercio, está a gañar presenza nos comercios do Ensanche. Ao mercar no comercio local, non só apoias a economía e a identidade da cidade, senón que tamén aforras en aparcamento e gozas dunha experiencia de compra máis cómoda e vantaxosa para ti e para a comunidade.
