Case un cento de comercios do Ensanche compostelán repartiron no Nadal de 2021-2022 agasallos a través da campaña de boletos con premio directo impulsada por Santiago Centro, Área Comercial. Os establecementos adheridos distribuíron máis de 500 premios, achegados polos propios negocios e pola Fundación Santiago Centro, nun esforzo para promover a fidelización dos clientes en datas especialmente importantes para o sector.
Os agasallos foron desde descontos directos de ata o 50% a produtos de primeira calidade como gafas das máis coñecidas marcas; tablets e lápices de memoria USB; mochilas; zapatos; libros; pequenos electrodomésticos; prendas de moda; cursos personalizados de inglés; complementos; artigos deportivos; reloxos; cestas de Nadal; consumicións en logcais hostaleiros; e vales de compra de ata 50€ para gastar nos establecementos asociados a Santiago Centro.
A campaña permaneceu vixente ata o día 5 de xaneiro e o seu funcionamento foi moi sinxelo: os establecementos entregaron aos clientes un boleto que, ao abrirse, indicaba se estaba premiado e onde se podía conseguir o agasallo, sen sorteos e de forma inmediata.
Santiago Centro contou nesta iniciativa co apoio do Concello de Santiago, da Deputación Provincial da Coruña e da Xunta de Galicia. Trátase de apoiar ás empresas no desenvolvemento da súa actividade nunha época clave do ano como é o Nadal, reforzando a zona moderna de Compostela como área principal de compras da cidade.
